《長篇》
57__________
近年經典事件:
一.主角:肥誠
幾年前暑假去長洲宿營,好不幸地我地租左六部單車,有三部比人偷左,
被偷果三部分別係我、Noel、肥誠既,我地去差館報案,警察就同我地落口供,
當同肥誠落口供時...
阿sir:黃志誠,你話當時鄭啟峰打電話比馬健聰,跟住馬健聰話你聽唔見左單車,係咪?
肥誠:係
阿sir:咁你知道後點樣?
肥誠:冇做D咩呀
阿sir:?你部單車比人偷左喎
肥誠:係呀
阿sir:咁你果時做緊咩?
肥誠:係茶餐廳睇緊波
阿sir:你知道部單車比人偷左後無其他反應,例如試下去搵咩?
肥誠:冇呀,都搵唔返架喇
阿sir:肥仔,你有冇搞錯呀... 你D朋友周圍搵緊,你就坐係到睇波,究竟係咪你部單車比人偷架...
之後
阿sir:黃志誠,請問你比人偷左部單車係點樣咩顏色既?
肥誠:係咁咁咁樣,顏色就... eh... 好似黃色... eh... 鄭啟呀,young呀,你地記唔記得我部單車係咩色?
阿sir:我再問你,究竟係咪你部單車比人偷架...
二.主角:肥誠
宿營離開時諗緊坐咩船,因為有人趕住出去,
所以打算坐飛翔船(快船),不過由於係公眾假期關係,太貴之下都係決定坐大船。
肥誠問我:鄭啟呀,大船同快船有咩唔同?
我:快船快D
肥誠:快船快幾多?
我:快船半個鐘左右出到,大船要一個鐘
肥誠:點解快船係快過大船既?
我:快船即係飛翔船,大船好大隻
肥誠:大船大隻唔係應該快D咩?佢地路線唔同架?
我:唔係,大船係呢D(我指比佢睇),快船細隻D快D的,佢地路線一樣
肥誠:啊,咁我地而家坐咩船呀?
我:大船
肥誠:點解唔坐快船既?
我:都話快船貴唔坐囉...
三.主角:嘉賢
嘉賢轉述我地聽既,有晚差唔多零時,佢由青衣城行返去長發,
佢一路行緊時,前面有個女仔都同一方向行緊;
行到長發,個女仔入左棟樓,剛巧係嘉賢住果棟;
入到大堂,個女仔入左部lift,剛巧嘉賢都係用果部返上樓;
個女仔同嘉賢都開始覺得唔對路,個女仔按下層數 31,
剛巧... 嘉賢都係住 31;
個女仔開始好驚,因為嘉賢當時著到好似個變態佬咁;
嘉賢都好驚,因為佢好驚比個女仔誤會佢;
到左,lift門一開,個女仔即刻跑返自己屋企,佢好驚嘉賢追住佢;
嘉賢亦都跑出去,佢好想快過女仔返到去以示自己係住果到;
個女仔不斷拍門叫屋企人快D開門;
嘉賢嘗試快D開到鐵閘;
兩個人都終於返到去啦,嘉賢聽到個女仔話佢既屋企人:
你地做咩咁遲先開門呀!我差D有事呀!
四:主角:肥誠
係今年中秋發生,我地係長發吹緊水,肥誠見到阿邦拎住本學車考筆試既書,
佢問阿邦難唔難,阿邦話:鄭啟話好易
肥誠就過黎問我...
肥誠:鄭啟,乜你有車牌咩?
我:冇呀
肥誠:咁你點解話筆試唔難既?
我:我考左筆試
(我以為佢跟住會問我幾時考路試,點知)
肥誠:咁你點解唔考埋路試呀?
...
五.主角:young
young 屋企一路都係用56k上網,早排佢終於決定轉寬頻,
但我地見咁耐都冇咩上網,就問佢轉左未,佢就話...
young:未呀,個師傅駁線時話有舊石仔阻住
我地:咁點解唔整碎舊石仔
young:唔得呀,舊石仔頂住晒,整唔爛
我地:唔係石仔咩?點解整唔爛
young:因為舊石仔係入面頂住晒
之後...
我:咁你幾時搞掂?
young:唔知呀,師傅都話搞唔掂
我:你有冇搵過其他師傅?
young:有呀,我搵左三次啦
我:咁多個都搞唔掂舊石仔?
young:唔係呀,係約左三次都冇人上黎
我:...
六.主角:邦同我
我地去長洲宿營果次,買左水槍走去沙灘玩,
射射下我支槍冇水,我就落水加水,我行返上來果時,
邦指住我隻腳大叫:鄭啟隻腳有蜘蛛呀!
跟住個個都走埋黎烏低身睇,
然後大家提議用水槍射走去,咁個個就用水槍射我隻腳,
隻蜘蛛散左,再細心望下,發現根本就唔係蜘蛛,只不過係我既腳毛...
連我自己都以為有蜘蛛...
[ 本帖最後由 鬼小子 於 2009-6-14 10:09 編輯 ]